Había moitas caras longas na zona do PP no pleno do luns na Deputación. Xa o contei onte. O que non contei é que, ao rematar, estes deputados xuntáronse con Xosé Manuel Barreiro, presidente provincial do partido, para facer unha primeira análise dos resultados. Asistiron doce, e iso que no pleno estiveron os quince que forman o grupo. Quince menos doce igual a tres. Que tres faltaron? Pistas: foron unha muller e un alcalde dos que gañaron sobrados. O terceiro supoño que non fará falta dicir quen era, non?

As malas caras eran compartidas por algúns dos populares gañadores e asistentes á xuntanza, como os alcaldes de Friol ou Baralla. O primeiro, Antonio Muiña Pena, estaba preocupado polos malos resultados do partido na provincia; o segundo, Manuel González Capón, porque gañou moi xusto e porque estivo detrás de moitas candidaturas do PP nos Ancares. A meirande parte delas caeron derrotadas.

Por certo, nos Ancares hai un concello no que o partido gobernante gañou aínda que cambiou de candidato nos últimos meses, algo que tamén pasou noutro concello da Mariña e en poucos sitios máis (Alfoz e Ourol). O montañoso é do PSOE; o costeiro, do PP. Digo eu que lles debeu dar sorte iso de que comezan igual: Cervantes e Cervo.

Esta entrada se publicó el Martes, 29 de Maio , 2007 a las 0:00 am y está clasificada en Xeral. Puedes seguir las respuestas a través de el feed RSS 2.0. Puedes dejar una respuesta, o trackback desde tu sitio.